AD ANTONIO CANEPA E…

AD ANTONIO CANEPA E…
tri martiri di la libirtà scurdati di la storia

“La Sicilia a li siciliani” dicevi!
Nun c’è virità cchiù granni
gridu cchiù dispiratu ca si perdi
nni la notti di lu tempu, ‘ncatinatu
‘ntra lu civu di l’arma e lu ciriveddu
d’ogni veru figghiu sicilianu
o almenu di cu’ nasci cu lu cori
a manca, russu comu muluna
lu fruttu cchiù duci di stu paradisu
ca ‘nfernu vonnu fari addivintari.

E‘ veru tutti nascèmu cu lu cori
a manca ma sulu pri sbagghiu
picchì scurdatizzu lu Signuri
pigghiatu di milli pinzera scurdò
di tinciri di niuru la gritta di lu pettu
a tutti li latri e li sucasangu
a cu’ ammazza pri ‘nteressi e vinnitti
a cu’ s’appropria di priputenza
di terri e sustanzi ca nun ci appartennu.

A ttia però, cchiù russu li lu sangu
fici lu cori, l’arma e la raggiuni
li ginirusi vrazza sempri pronti
a dari, a luttari pri sta terra
dunni latti e meli aveva a scurriri
nna li ciuma persi nni la so’ panza
e ‘nveci di sangu si vunciaru
pri li tanti bastardi straneri e taliani
ca ‘nvidiusi di li nostri ricchizzi

li biddizzi, suli mari e ‘ntilligenza
d’un populu amurusu di vrazza e cori
di tutti l’agnuni nni pigghiaru
d’ogni strata, porta, celu e mari
e comu gaddi e gaddini cu forza
dintra li gaggi nni cacciaru
futtènnusi terra, libirtà, onuri…
ma non tutti s’arrassignaru
non tutti foru o sunnu ciriveddi di canigghia

canigghia ca leggia si spanni a lu ventu
e senza sapiri dunni jri
scancia volubbili li cantunera…
tu Antoniu, partigianu e prisidenti
di l’esercitu ca libbira vuleva sta terra’
‘nzemmula a li cumpagni di svintura
fustivu di chiddi ca misinu
panza cori, fantasia e amuri…
la raggia però ca mi sfunna lu pettu
è puru pri li bastardi guverni taliani

ca cu arti ancora picciridda mi ‘ngannaru
facennumi pri tant’anni annamurari
d’un favusu eroi e mai di tia…
c’avissi cantatu lu to’ ‘ncignu
e lu curaggiu, purtatu pedi e ciuri
a lu cippu di “Rannazzu” dunni a tradimentu
l’aggrissura sangu vippiru pri acqua
e comu ficiru cu Pippinu ‘Mpastatu
du voti v’ammazzaru facennuvi passari
pri briganti, ammucciannu virità a la genti.

Ma la munzìgnaria, rrina ca lu mari
spissu porta a galla, riti trasparenti
ca prima o poi lu suli sfunna…
doppu cchiù di 60 anni comu miraculu
grapìu li me’ occhi ‘ncatramati
nni lu ‘ngannu e pensu ca siddu vera
nun fussi la storia, nun s’avissiru pigghiatu
lu culu a mmuzzicuna p’ammuccialla
e tu nun ripusassi nni lu viali di li galantomi
allatu di Ancilu Muscu e Giuvanni Verga.
di Lina La Mattina