A LA ME' TERRA

‘Na gran puitissa è la me’ terra
ca scrissi la storia supra petri e casteddi
ma puru siddu havi li carni sfardati
l’ossa camuluti, la testa ‘nfasciata
sapi ancora cantari cu l’unni di lu mari
la carizza di lu ventu lu duluri di la genti!

N’agugghia d’oru cu la punta fina
ca supra la ‘nfamità, li guerri, li ruini
sapi ancora arripizzari pirtusa
arraccamari cu la sita di li ciura
l’azzolu di celu e l’annacata di li varchi
sutta lu sciddicusu villutu di la notti!

Riggina tra li riggini è la me’ terra
vistuta d’innacu, oru e gialla e russa
la bannera sutta un cappeddu di lustru
di luna, arraccamatu cu stiddi d’argentu
dintra ‘na reggia cu jardini e funtani
ma senza cumannu nè senza curuna!

Aceddu ‘nchiusu dintra ‘na gaggia
chi canta pri stizza o pri raggia cu vuci
di rusignolu ‘zemmula a pecuri lupi liuna
arrialannu putìri a cu’ dignu nun è
facennu addivintari miraggiu
lu pani l’aria, lu curaggiu e la libirtà…

Ma comu cinìsi assittati supra la riva
d’un ciumi, puru nuàutri siciliani
cu la spiranza ca nni vuncia lu pettu
e vuci mai stanchi comu l’unni
di lu mari… aspittamu ca junci lu tempu
di ‘na Sicilia lìbbira, sana e ‘ndipinnenti!

23 maggio 1980 R.C. 29 settembre 2009