A MESSINA E A LI SO' MORTI

Vugghi e rivugghi comu pignata
sempri china di gialla scumazza
la panza mai sazia di la terra…
e si nni vannu comu cani vastuniati
senza requiem “silenzi” né funirali di statu

l’affucati, anniati dispirati e scripintati
comu scravagghi sutta muntagni
di petri, di fangu… li marturiati
figghiastri di sta “ginirusissima" terra
ancora ‘na vota pistati sutta l’italicu pedi.

Lu sacciu Signuri ca la natura è stanca
d’esseri pigghiata a carcagnati di l’omu
e ogni tantu a raggiuni si ribella
facennusi veniri trimulizzi, virticchi
ma pirchì a pagari sunnu sempri li nnuccenti?

Pichì tirrimoti alluviuna bummi e pistilenzi
nun fannu mai dannu supra li tanti “Sodoma
e Gomorra”…casi e villi di li sucasungu
di piccatura ‘mpinitenti… forsi scrincisti
sulu cu li putenti patti d’allianza, di “desistenza”?

Pirchì sti trona di l’aria, nun abbrucianu
e siccanu manu e vucchi di bastardi mintitura
di farfalluna e criminali, di cuncutrigghi e caini
ca stu cannistru d’erba ciarusa jincheru
pistiannu a giramanu di fangu morti e tritolu?

Lu ‘nvintasti forsi tu lu dittu di lu cani
“ca muzzica sempri lu cchiù sfardatu”
o esisti un santu prutitturi pi li miserabili
li facci di culu, facci ca nun cunuscinu
nè russura né vriogna, facci cchiù duri di li petri?

Pirduna l’irriverenza Signuri, sicca puru
la me’ vucca siddu ti fa piaciri, tagghia
scippa, abbrucia la radica di lu me’ ciriveddu
ma ‘nzinu a quannu mi darai un ciatu, un alitu di vita
nun pozzu fari a menu di pinzari scriviri parrari...

Nun pozzu fari a menu d’arriprinniri
puru a tia Signuri, pirchì veru è ca nni dasti
biddizzi ginirusità orgogliu, ma pirchi n’accudi
a genti senza cori, pirchì nni sdirrubbi
e nni fai mettiri ‘ncruci puru di li stissi frati?

Chi nni voi di sti poviri disprizziati siciliani
sbinnuti pi nenti supra a lu mircatinu di la morti
‘ndigni di miritari macari un minutu di rispettu
quali debbiti avemu ancora di scuttariSignuri?
E forsi chistu lu giustu lu prezzu pi l’isula ca nni dasti?

7 ottobre 2009 LINA LA MATTINA